IRIDU AKTAR OPPORTUNITAJIET TA’ XOGĦOL F’GĦAWDEX

Żgħażagħ Għawdxin jixtiequ aktar opportunitajiet ta’ xogħol f’Għawdex, minkejja li jifhmu li llum ikollhom jagħmlu karriera f’Malta jew lil hinn minnha. F’laqgħa mal-MEP Alfred Sant f’Għawdex dawn saħqu għal aktar investiment fl-infrastruttura tal-ekonomija, fosthom it-tieni ‘Fibre optic cable’. L-istudenti saħqu għal sinerġija aħjar bejn l-istituzzjonijiet akkademiċi u vokazzjonali u d-dinja tax-xogħol.  Semmew it-tħassib tagħhom dwar l-inugwaljanza fil-pagi f’Malta u f’Għawdex. Dwar opportunitajiet ta’ xogħol fl-industrija tat-turiżmu, iż-żgħażagħ u Dr Sant qablu li hemm nuqqas ta’ investiment f’dan il-qasam. Iż-żgħażagħ semmew l-involviment tagħhom biex jinkoraġġixxu żgħażagħ oħra jiżviluppaw il-ħiliet tagħhom f’laqgħat u attivitajiet sportivi.

Dr Sant qal li sfortunatament il-qagħda f’Għawdex hija riflessa fi gżejjer żgħar oħra f’Ċipru, l-Italja, Spanja, il-Greċja u l-Kroazja li għandhom sfidi simili. Dawn il-gżejjer għandhom problemi ta’ konnettivita` u attivitajiet ekonomiċi limitati.

Dr Sant qal li sakemm l-Unjoni Ewropea ma tillaxkax ir-regoli u l-politika tagħha, gżejjer żgħar bħal Għawdex jibqgħu jitilfu aktar żgħażagħ li jkollhom ifittxu l-futur tagħhom f’Malta. Huwa stieden liż-żgħażagħ jattendu għal Konferenza dwar l-iżvilupp ta’ Għawdex fl-Ewropa nhar il-Ġimgħa 28 ta’ Ottubru fil-Grand Hotel, l-Imġarr Għawdex.