IS-SANZJONIJIET KONTRA R-RUSSJA ESTIŻI B’SITT XHUR

Is-sanzjonijiet tal-Unjoni Ewropea kontra r-Russja mistennija jiġu estiżi b’mod formali għal sitt xhur oħra. Din id-deċiżjoni hija marbuta mal-miżuri kontra r-Russja skond il-ftehim ta’ Minsk. Il-President tal-Kunsill Ewropew Donald Tusk mistenni jressaq id-deċiżjoni għal ‘diskussjoni qasira’ waqt is-Summit Ewropew tas-17 u 18 ta’ Diċembru. Din il-mossa mistennija tqajjem diskussjoni wiesgħa waqt l-istess Summit. F’ittra li bagħat lill-Kapijiet tal-pajjiżi tal-Unjoni Ewropea, Tusk talab l-ambaxxaturi tal-UE li se jiltaqgħu l-Ġimgħa 18 ta’ Diċembru biex jaqblu mal-estenzjoni tas-sanzjonijiet. L-Ambaxxaturi tal-UE kienu kważi qablu dwar dan il-ġimgħa l-oħra, iżda l-Italja mblukkat id-deċiżjoni biex ‘ikollha diskussjoni aktar wiesgħa dwar is-suġġett’. L-UE imponiet is-sanzjonijiet kontra r-Russja minħabba l-involviment tagħha fil-Lvant tal-Ukraina.