IS-SERBJA MISTENNIJA SSIR MEMBRU TAL-UE 

Il-Prim Ministru l-ġdida tas-Serbja Ana Brnabic qalet lill-Parlament Ewropew li pajjiżha mhux viċin ir-Russja kif jaħsbu bosta iżda qalet li pajjiżha “għandu relazzjonijiet tajbin ħafna mar-Russja, u rabtiet kulturali u reliġjużi”. Ħafna Serbi jikkonsidraw ir-Russja bħala “ħabiba minħabba l-appoġġ li uriet fis-snin tmenin” imma l-Prim Ministru qalet li din ir-relazzjoni “m’għandhiex tkun ostaklu għall-integrazzjoni Ewropea.”

Mistoqsija dwar ir-relazzjoni militari bejn Belgrad u Moska, Brnabic qalet li fl-2016 minn 16-il eżerċizzju militari multinazzjonali li fih ħadet sehem is-Serbja – 9 kienu mal-Istati Uniti u 2 biss kienu mar-Russja. Fl-2017 minn 15-il eżerċizzju militari – 13 saru man-NATO u 2 mar-Russja. Brnabic qalet li pajjiżha jrid jibqa’ militarment newtrali u filwaqt li tixtieq integrazzjoni Ewropea, is-Serbja ma tridx tkun membru tan-NATO.

L-UE tikkritika lis-Serbja li mhux timxi mas-sanzjonijiet kontra r-Russja fuq il-kriżi tal-Ukraina u l-okkupazzjoni tal-Krimea.

Brnabic qalet li 49% tas-Serbi huma favur l-UE u l-perċezzjoni tan-nies qed iddur favur l-Unjoni. Hi qalet li l-prijoritajiet tagħha se jkunu d-dinja diġitali u l-edukazzjoni, l-istabbilita` ekonomika, riformi fis-settur pubbliku u l-ħarsien tas-saltna tad-dritt.

Is-Serbja taspira li tkun stat membru tal-Unjoni Ewropea.

Il-Kummissarju għat-tkabbir tal-UE Johannes Hahn qal li l-progress tas-Serbja huwa inkoraġġanti u qed jittama li jinfetħu kapitli ġodda ta’ negozjar ma’ dan il-pajjiż qabel tmiem din is-sena. Hahn qal li ma għandux dubju li “is-Serbja se ssir membru tal-UE malajr ħafna”.