Is-Summit ta’ Bratislava tas-16 ta’ Settembru se jkun iffukat fuq is-sigurta` interna u esterna tal-Unjoni Ewropea. Għall-ewwel is-Summit kien maħsub li jiffoka fuq il-futur tal-UE wara l-BREXIT. Dan huwa Summit ‘informali’ peress li r-Renju Unit għadu ma telaqx mill-UE, iżda l-Prim Ministru Ingliża mhux mistiedna. Mhux mistennija li jkun hemm diskussjoni formali dwar il-BREXIT għax ir-Renju Unit għadha ma tatx data għal Artiklu 50 li jiftaħ il-proċess tad-divorzju bejnha u l-UE.
Fl-aħħar jiem il-Kanċilliera Ġermaniża Angela Merkel għamlet dak li qed jissejjaħ it-Tour ta’ wara l-Brexit. Merkel ippruvat issib kompromess bejn dawk il-pajjiżi li jridu aktar integrazzjoni Ewropea u dawk il-pajjiżi li jridu aktar poteri fuq livelli nazzjonali. Merkel kellha għadd ta’ laqgħat ma’ mexxejja tal-istati membri tal-UE . Uħud minnhom jixtiequ aktar integrazzjoni, waqt li oħrajn, bħal pajjiżi tal-Lvant, jixtiequ aktar sovranita` u aktar poteri fuq livell nazzjonali.
Merkel qalet li l-enfasi tas-Summit se jkun fuq il-ħolqien tal-impjiegi għaż-żgħażagħ u t-tisħiħ tas-sigurta` fl-Ewropa. “Fi Bratislava għandna nsibu metodi li jtejbu l-ekonomija, il-ħolqien tal-impjiegi għaż-żgħażagħ kif ukoll metodi li jsaħħu is-sigurta` interna tal-UE u tal-fruntieri Ewropej. L-UE għandha tirrifletti dwar id-direzzjoni li se tieħu l-UE fil-futur wara d-deċiżjoni tal-BREXIT.”
Settur wieħed fejn qed jintqal li jeħtieġ aktar kooperazzjoni huwa dak tad-difiża u l-ispjunaġġ, li eventwalment jista’ jwassal għat-twaqqif ta’ armata Ewropea. Il-Prim Ministru tar-Repubblika Ċeka Bohuslav Sobotka qal li s-sigurta` Ewropea u l-kooperazzjoni fil-qasam tad-difiża, flimkien man-Nato, għandhom jingħataw prijorita` fid-dawl tat-theddid għas-sigurta` u fil-ħtieġa li jkunu protetti aħjar il-fruntieri esterni tal-UE.
Merkel iltaqgħet mal-pajjiżi tal-Visegrad – ir-Repubblika Ċeka, l-Ungerija, il-Polonja u s-Slovakkja fejn iddiskutiet il-politika tal-immigrazzjoni. Dawn il-pajjiżi jemmnu li l-Ġermanja emfasizzat wisq l-iskema ta’ rilokazzjoni mandatorja tal-immigranti mingħajr ma kkunsidrat is-sentimenti nazzjonali tal-pajjiżi membri. Fi Praga kien hemm risentiment għall-politika ta’ Merkel. Raġel ġie arrestat wara li pprova jidħol bil-Mercedes fuq il-karozzi tad-delegazzjoni Ġermaniża.
Merkel iltaqgħet ukoll mal-pajjiżi Nordiċi f’laqgħa mal-Prim Ministri tad-Danimarka, Finlandja, Svezja u Olanda. F’laqgħa separata Merkel tkellmet mal-mexxejja tal-Awstrija, Bulgarija, Kroazja u Slovenja.
Il-Prim Ministru Griek Alexis Tsipras stieden lil mexxejja ta’ Franza, Italja, Spanja, Portugall, Ċipru u Malta għal konferenza bl-għan li tissaħħaħ l-alleanza bejn dawn il-pajjiżi tas-Sud tal-Unjoni Ewropea. Il-laqgħa se ssir għada 9 ta’ Settembru 2016.
IS-SIGURTA` FUQ QUDDIEM TAL-AĠENDA
Read MoreERDOGAN XKIEL GĦAS-SĦUBIJA TAT-TURKIJA FL-EWROPA
Read MoreIR-RENJU UNIT IFITTEX OPPORTUNITAJIET ĠODDA
Read MoreANQAS IMMIGRANTI JASLU L-ITALJA
Read MoreMA JAQBLUX DWAR IS-SANZJONIJIET RUSSI
Read MoreREAZZJONI FURJUŻA KONTRA BARROSO
Read MoreFRANZA KONTRA T-TTIP
Read MoreARINGI FLOK SOTTOMARINI RUSSI
Read More
Post a comment