IS-SOĊJALISTI DEMOKRATIĊI JEGĦLBU LIL LEMIN ESTREM FIL-FINLANDJA

Fl-elezzjoni ġenerali tal-Finlandja s-Soċjalisti u Demokratiċi għelbu bi żbrixx lill-Partit tal-Lemin estrem fil-Finlandja meta fl-elezzjoni ġenerali ġabu l-aktar voti b’17.7%.  Il-lemin estrem żied ħafna fl-appoġġ b’aġenda kontra l-immigrazzjoni.

Is-Soċjalisti u Demokratiċi kisbu 40 siġġu fil-parlament b’kampanja li saħqet kontra l-miżuri ta’ awsterita` mwettqa mill-partit taċ-ċentru lemin fil-gvern.

Issa qegħdin fil-gvern wara sittax-il sena.

Il-partit tal-Lemin estrem kiseb 39 siġġu fil-parlament, li jfisser li rdoppja s-siġġijiet tiegħu.

Normalment fil-Finlandja tiggverna koalizzjoni ta’ bejn tlieta u erba’ partiti. Il-Kap tas-Soċjalisti qal li se jkun “diffiċli ħafna” li jidħol f’koalizzjoni ma’ partit tal-lemin estrem iżda ma eliminax l-fatt li jista’ jkun hemm kollaborazzjoni.

Is-Soċjalisti jistgħu wkoll jagħmlu koalizzjoni mal-Konservattivi biex iwaqqfu lill-partit tal-lemin estrem milli jiggverna. Kollox  jiddependi mit-taħdidiet li għaddejjin bħalissa.