IT-TURKIJA MHUX IMPRESSJONATA BIL-PROPOSTI EWROPEJ DWAR L-IMMIGRAZZJONI

Il-Kummissjoni Ewropea ħabbret il-pjan ta’ azzjoni li ppreżentat lill-President Tork Erdogan dwar l-immigrazzjoni. Dan il-pjan jinkludi sensiela ta’ inizjattivi, bl-UE tgħin lit-Turkija fl-influss ta’ immigranti permezz ta’ programmi biex jiġu rilokati n-nies f’pajjiżha stess. It-Turkija, biex tpatti għal din l-għajnuna trid tikkontrolla aħjar l-influss ta’ immigranti li jridu jidħlu fl-Ewropa u tiġġieled kontra x-xbieki kriminali li jmexxu l-kutrabandu tal-persuni.

Taħt dan il-pjan ta’ azzjoni, l-Unjoni Ewropea ħabbret li se tinforma aħjar lir-refuġjati li jinsabu fit-Turkija dwar ir-riskji involuti meta l-immigranti jaqsmu l-fruntieri tal-Ewropa b’mod illegali. Se tinfurmahom ukoll dwar il-possibilitajiet biex jidħlu fl-Unjoni Ewropea b’mod legali. L-Unjoni Ewropea qed tgħid li se tappoġġja lit-Turkija biex taqbad il-kuntrabandisti tan-nies billi ssaħħaħ l-għasses fuq il-kosta tat-Turkija. Uffiċċjal tal-Frontex se jiġbor l-informazzjoni dwar ix-xbieki tat-traffikanti tan-nies. It-Turkija se tingħata għajnuna finanzjarja biex ittejjeb l-immaniġjar tal-fruntiera tagħha. Dan jinkludi titjieb tal-apparat użat biex tgħasses il-fruntieri tagħha. It-Turkija se tintensifika l-koperazzjoni tagħha mal-Frontex u mal-għassiesa tal-kosta Griega u Bulgara. Mistennija wkoll li tħaffef il-mod kif tipproċessa l-immigranti.

Fuq l-aspett umanitarju, l-UE qed tgħid li se tagħti aktar għajnuna finanzjarja lit-Turkija biex jitjiebu l-kundizzjonijiet ta’ għejxien tar-rifuġjati. It-Turkija se tiftaħ sitt ċentri tar-refuġjati, permezz ta’ kofinanzjament tal-Unjoni Ewropea.

Il-Prim Ministru Islamiku-Konservattiv Tork, Ahmet Davutoglu ma tantx wera entużjażmu għal dan il-pjan ta’ azzjoni u qal li t-Turkija mhux kamp ta’ konċentrament. Davutoglu qed jirrifjuta li jilqa’ l-immigranti li l-Unjoni Ewropea ma tridx, b’mod permanenti f’pajjiżu. Davutoglu qal lil Merkel li l-Unjoni ma tistax tagħti l-flus biex l-immigranti jibqgħu t-Turkija.

Intant il-President Tork Erdogan qed jimbotta biex it-Torok jiksbu l-liberalizzazzjoni tal-visa. Erdogan jixtieq li jagħti spinta lin-negozjati biex it-Turkija ssir membru fl-Unjoni Ewropea.

Għalkemm Merkel ħasbet li kellha l-kollaborazzjoni tat-Torok, għal issa t-Turkija għadha ma aċċettatx il-kundizzjonijiet ta’ dan il-ftehim, u l-mexxejja Torok għadhom qed juru x-xettiċiżmu tagħhom fil-pubbliku.