IT-TURKIJA TITBIEGĦED MIN-NATO

It-Turkija taħt Erdogan qiegħda titbiegħed kontinwament mill-Istati Uniti u in-NATO u tersaq aktar qrib ir-Russja. It-Turkija għadha membru tan-NATO imma darba wara l-oħra tgħid li ftehmet li tixtri sistema Russa ta’ difiża militari. Dan minkejja t-twissijiet tal-Istati Uniti li s-sistema Russa ma tistax tiġi integrata mas-sistema tad-difiża tal-ajru tan-NATO. It-Turkija hija strateġikament importanti għan-NATO fir-reġjun tal-baħar l-iswed.

Id-difiża missilistika hija essenzjali għan-NATO. L-Istati Uniti qalet lit-Turkija li jekk tixtri s-sistema Russa, tmur lura mid-deċiżjoni li tbigħ ajrupani tal-ġlied F-35 lit-Turkija. It-Turkija trid tixtri 120 minn dawn l-ajruplani.

F-35 huwa tip speċjali ta’ ajruplan tal-gwerra. L-Istati Uniti ma tbigħu lil ebda pajjiż, iżda kienet qablet li tbigħu lit-Turkija.

Il-President Tork Erdogan qal li se jixtri s-sistema millistika Russa. Erdogan diġa` akkuża lill-Istati Uniti li kienet involuta fl-attentat ta’ kolp ta’ stat tal-2016. Erdogan jgħid li l-Istati Uniti qed tagħti kenn politiku lil Fethullah  Gülen, l-għadu politiku ewlieni ta’ Erdogan.

Trump u Erdogan mhux jaqblu dwar is-Sirja u anke dwar il-Veneżwela.

It-Turkija qed tikkopera wkoll mar-Russja fuq proġetti kbar bħall-proġett tal-pipeline tal-gass li se jkun esportat lejn l-Ewropa.