IT-TURKIJA WARA L-BIEB

Wara suluzzu twil ħafna snin, l-UE mistennija tiftaħ kapitli ġodda ta’ negozjati biex it-Turkija ssir membru sħiħ tal-UE, fosthom kapitlu 17 li jitratta l-politika ekonomika u monetarja. L-Ewropa mistennija wkoll tiffaċilita l-proċess għal-liberalizzazzjoni tal-visa, imma d-deċiżjoni mhux se tittieħed qabel tmiem is-sena 2016. Dan għaliex l-Unjoni tkun trid tivverifika li t-Turkija qed terġa’ tilqa’ lura dawk l-immigranti li telqu minn xtutha u daħlu b’mod illegali fl-UE.

It-taħdidiet li qed isiru mat-Turkija huma mmexxija mix-xewqa tal-UE biex it-Turkija tgħin fil-kriżi tal-immigrazzjoni. L-UE qed tipproponi li tagħti €3 biljun lil NGOs fit-Turkija li jieħdu ħsieb 2.5 miljun rifuġjat Sirjan. Il-ftehim għadu ma ntlaħaqx għax l-UE qed titkellem dwar pagament wieħed ta’ €3 biljun, filwaqt li t-Turkija trid €3 biljun fis-sena. It-Turkija qed titlob ukoll li fil-futur ikollha laqgħat regolari u anki summits mal-UE.