IŻ-ŻONA EWRO BDIET TIRPILJA

B’mod kajman u bis-saħħa ta’ stimolu qawwi mill-Bank Ċentrali Ewropew, iż-żona ewro qed turi sinjali li qed tirpilja. Fl-aħħar kwart tas-sena 2015 it-tkabbir ekonomiku kien ta’ 1.6% għalkemm dawn is-sinjali pożittivi, mhux jinħassu fil-pajjiżi kollha tal-UE. Il-Bank Ċentrali Ewropew qed ibassar li t-tkabbir għal din is-sena se jkun ta’ 1.7%.

Il-qgħad, għalkemm għadu għoli ħafna (10.5% f’Novembru) qed jonqos b’mod konsistenti u qiegħed fl-iktar rata baxxa li ġiet reġistrata f’4 snin.

Dan it-tkabbir għadu fraġli u f’riskju li jikkollassa. Bħalissa l-ekonomija Ċiniża qed tnaqqas mir-rankatura li kienet fiha. Iċ-Ċina hija t-tieni l-akbar ‘trading partner’ tal-UE, wara l-Istati Uniti. Skont il-Kummissjoni Ewropea, iċ-Ċina u l-Unjoni Ewropea idawru mal-biljun ewro ta’ kummerċ kuljum bejniethom. Il-UBS jikkalkula li jekk l-ekonomija Ċiniża titlef mir-rankatura, jonqos ukoll it-tkabbir tal-UE.

Is-60 biljun ewro fix-xahar tal-Bank Ċentrali Ewropew maħsubin biex iservu ta’ stimolu jistgħu jgħinu biex l-ekonomija Ewropea tirribatti għall-inkwiet ekonomiku li jseħħ lil hinn minnha.