JASLU AKTAR IMMIGRANTI FIL-BALKANI

Is-sitwazzjoni tal-immigrazzjoni fil-punent  tal-Balkani għadha mhix fi stadju allarmanti, iżda l-wasliet żdiedu, speċjalment mir-rotta tal-Albanija, Bosnja-Herzegovina, Montenegro u Serbja, qal il-Kummissarju Avramopoulos waqt laqgħa tal-Ministri tal-Intern tal-pajjiżi Balkani. Preżenti f’din il-laqgħa l-Ministru tal-Intern Awstrijak Herbert Kickl biex jiddiskuti s-sitwazzjoni tal-immigrazzjoni fir-rotta tal-Punent Balkani u jħejji lil pajjiżu għal Presidenza tal-Kunsill tal-Unjoni Ewropea li jmiss.

Il-Kummissjoni Ewropea tkellmet dwar l-importanza li tibqa’ “viġilanti” u “biex tevita li s-sitwazzjoni tmur għall-agħar”.

Din il-laqgħa seħħet fi klima partikolari fl-UE, bl-istati membri jipprovaw jaqblu dwar soluzzjoni fir-riforma dwar l-immigrazzjoni.

L-UE mistennija tipproponi t-twaqqif ta’ pjattaformi (barra l-UE) li fihom tittieħed opinjoni dwar min jista’ jikseb protezzjoni fl-UE jew le.

Din mhix l-ewwel darba li l-Ewropej ikkonsidraw din l-idea ta’ ċentri għall-identifikazzjoni tal-kandidati għall-ażil f’pajjiżi barra l-UE, partikolarment f’pajjiżi Afrikani.

Il-Kummissjoni wriet li lesta tiddiskuti din il-possibilita` iżda hija xettika dwar kemm se tkun effettiva.