JINŻEL IL-QGĦAD FL-ISTATI MEMBRI KOLLHA

Ir-rata tal-qgħad fl-Unjoni Ewropea kollha niżlet minn 8.7% f’Mejju tal-2016 għal 7.8% f’Mejju tal-2017. Fiż-żona ewro l-qgħad naqas minn 10.2% għal 9.3% fuq l-istess perijodu.

Il-Kummissarju tax-Xogħol u l-Affarijiet Soċjali Marianne Thyssen qalet li għall-ewwel darba mill-2001 ’l hawn il-qgħad niżel fl-istati membri kollha. Ir-rata tal-qgħad issa hija l-iktar waħda baxxa minn Diċembru tal-2008 ’l hawn.

Dawn il-persentaġġi juru li 19.115-il miljun ruħ fl-UE ta’ 28 pajjiż irreġistraw biex isibu xogħol f’Mejju tal-2017. Dan ifisser nuqqas ta’ 2.122 miljun minn Mejju tal-2016. Il-Kummissarju Thyssen qalet li għad hemm differenzi kbar fir-rati tal-qgħad bejn stat membru u ieħor – minn 3% fir-Repubblika Ċeka, 3.9% fil-Ġermanja u 4% f’Malta għal 22.5% fil-Greċja u 17.7% fi Spanja. Il-Kummissarju nnotat li xorta Spanja kellha tnaqqis sostanzjali fir-rata tal-qgħad li f’Mejju tal-2016 laħħqet l-20.2%.

Il-qgħad fost iż-żgħażagħ (ta’ eta` bejn 18-24 sena) jibqa’ pjaga minkejja li naqas bi ftit, minn 19% għal 16.9% fit-28 pajjiż u minn 21.3% għal 18.9% fil-pajjiżi taż-żona ewro.