JIPPERSISTU D-DIVERĠENZI BEJN IR-REĠJUNI

Id-differenzi soċjo-ekonomiċi u demografiċi bejn in-Nord u s-Sud tal-Unjoni Ewropea għadhom b’saħħtihom. Dan ħareġ minn studju ppubblikat mill-Eurostat u li uża tliet indikaturi prinċipali: il-Prodott Gross Domestiku per capita, l-iżvilupp demografiku (studju xjentifiku tal-popolazzjoni) u r-rata tal-qgħad. Dan l-istudju wera li kien hemm xi tip ta’ konverġenza bejn il-perijodu 2000-2014. Dan għaliex fis-sena 2000 il-Prodott Gross Domestiku tar-reġjuni l-aktar sinjuri fl-Ewropa kien ta’ 2.8 darbiet ogħla minn dak fir-reġjuni inqas żviluppati. Fl-2013, din id-differenza naqset imma fl-istess waqt baqgħet għolja ħafna f’reġjuni ta’ stati bħar-Renju Unit, Rumanija, Slovakkja u Franza.

Studji xjentifiċi tal-popolazzjoni huma indikaturi ċari li juru d-diverġenzi bejn ir-reġjuni tal-Unjoni Ewropea. Bejn l-2008 u l-2014, il-popolazzjoni tal-UE żdiedet b’1.3%, biex issa laħqet 507 miljun ruħ. Saru xi osservazzjonijiet kemm fuq livell Ewropew u kemm fuq livell nazzjonali. Fuq livell Ewropew, il-pajjiżi tal-Lvant u l-Baltiċi (b’mod partikolari l-Litwanja u l-Latvja), qed jesperjenzaw tnaqqis fid-demografija tagħhom. Bil-kontra ta’ dan, il-Lussemburgu u Ċipru esperjenzaw żieda. Fuq livelli nazzjonali, l-istħarriġ juri li qed tonqos il-popolazzjoni f’żoni rurali u qed tiżdied fiż-żoni urbani u fl-ibliet. Dan it-tibdil joħroġ ċar fil-qasam tax-xogħol u l-impjiegi.

Il-Kap tad-delegazzjoni Laburista fil-Parlament Dr Alfred Sant kemm-il darba saħaq dwar il-ħtieġa li jonqsu d-diverġenzi bejn l-Istati sinjuri tal-Unjoni Ewropea u dawk li qegħdin fil-periferija tal-Ewropa, li huma stati gżejjer jew qegħdin f’żoni mwarrba. L-istudju wera li dawk ir-reġjuni li qegħdin fi tranżizzjoni – jiġifieri li qed jieħdu l-għajnuna mill-UE biex jiżviluppaw, huma l-aktar li ntlaqtu ħażin mill-kriżi.