JIŻDIEDU L-INUGWALJANZI SOĊJALI

Il-ħolqien tax-xogħol u l-qagħda soċjali sejrin għall-agħar fl-Ewropa. Minkejja ftit sinjali pożittivi, l-effetti tal-kriżi għadhom jinħassu filwaqt li d-diverġenzi bejn il-pajjiżi u anki f’żoni differenti tal-istess pajjiż qed jiżdiedu. Dan ħareġ mir-rapport tal-Kummissjoni Ewropea dwar ix-xogħol u l-iżvilupp soċjali fl-2015.

Ir-rapport jinnota l-aħħar żviluppi fil-qasam tal-impjiegi u fil-qasam soċjali. Jikkunsidra l-isfidi li ġejjin u l-modi kif jingħelbu. Jagħti daqqa t’għajn dettaljata lejn l-aktar gruppi vulnerabbli fis-soċjeta` bħan-nisa, l-anzjani, iż-żgħażagħ u n-nies bla xogħol.

Ir-rapport jgħid li filwaqt li l-impjiegi żdiedu, il-qgħad għadu għoli ħafna f’pajjiżi bħal Spanja u l-Greċja fejn għadu ’il fuq minn 20%. Il-kuntratti tax-xogħol li huma temporanji, b’terminu fiss jew part-time żdiedu. Dan mhux it-tip ta’ xogħol li jixtiequ l-ħaddiema Ewropej. F’Ċipru, 94.3% ta’ dawk li għandhom kuntratt ta’ xogħol temporanju huma mdejqa b’din il-kundizzjoni, filwaqt li fl-Awstrija 8.8% huma mdejqa minħabba l-istess ħaġa.

Il-Kummissjoni qed tgħid li se tippreżenta l-proposti tagħha biex titjieb is-sitwazzjoni.