JONQSU L-IMMIGRANTI MILL-BAĦAR EĠEW

Il-Kummissjoni Ewropea kellha reazzjonijiet pożittivi għall-implimentazzjoni  tal-ftehim bejn l-UE u t-Turkija u innotat progress dwar l-imigrazzjoni. In-numru ta’ immigranti li jipprovaw jaqsmu l-baħar Eġew qed ilaħħqu medja ta’ 92 kuljum, filwaqt li qabel il-ftehim din ir-rata anki laħqet l-10, 000 kuljum. Il-Greċja qed tibgħat lura l-immigranti li mhux eleġibbli għal protezzjoni internazzjonali. B’kollox s’issa ntbagħtu lura 1, 187 persuna iżda l-Kummissjoni qalet li l-proċedura tar-ritorn qed iddum wisq. Is-Sirjani li ħallew il-Greċja għamlu dan b’mod volontarju.

Il-Kummissjoni qalet li s-sitwazzjoni teħtieġ monitoraġġ kontinwu biex ikunu identifikati l-persuni eleġibbli għal protezzjoni. Għal dan il-għan jeħtieġu aktar riżorsi. Il-ftehim mat-Turkija kien jinkludi l-fatt li t-Torok ma jkollhomx aktar bżonn ta’ Visa biex jidħlu fl-UE

wara li t-Turkija timplimenta l-miżuri kollha maqbula fil-ftehim. S’issa t-Turkija fadlilha 7 miżuri xi twettaq u l-Kummissjoni qiegħda fi djalogu mat-Turkija dwar it-tibdiliet leġiżlattivi meħtieġa. L-iktar tibdil sensittiv jinkludi l-liġijiet ta’ kontra t-terroriżmu.