KORPI MEDIĊI EWROPEJ F’KAŻ TA’ EMERĠENZA

L-UE għadha kemm nediet il-Korpi Mediċi Ewropej. F’kas ta’ emerġenza fil-qasam tas-saħħa, l-Unjoni tkun tista’ tibgħat dawn it-timijiet mediċi u t-tagħmir tagħhom malajr, kemm fi ħdan l-UE u kemm f’pajjiżi terzi. Din it-taqsima saret wara l-esperjenza tal-kriżi tal-Ebola fil-Punent tal-Afrika.

Il-Korpi Mediċi se jkunu pprovduti mill-pajjiżi membri, jinkludu tobba, esperti, laboratorji, ‘aircrafts’ u timijiet ta’ appoġġ loġistiku. L-għan huwa li jkun hemm rispons tajjeb u bla dewmien f’kas ta’ kriżi fil-qasam tas-saħħa. Dawn il-korpi huma parti mis-sezzjoni tal-protezzjoni ċivili tal-UE.

Huma ħafna n-nies li għadhom jgħixu fil-faqar, f’nuqqas ta’ sanita` adegwata u mingħajr servizzi tas-saħħa. Dawn il-fatturi flimkien mal-globalizzazzjoni, l-ivjaġġar u l-fatt li d-dinja qegħda tisħon, joħolqu kundizzjonijiet biex virus joħloq pandemija. Għalhekk il-bżonn ta’ timijiet mediċi ta’ dan it-tip.