L‑EWROPA INĊERTA DWAR L‑ISFIDI EKONOMIĊI U UMANITARJI

L-Ewropa tinsab fi stat ta’ inċertezza dwar kif l-aħjar tidderieġi l-ekonomija tagħha; dwar kif tikkonsolida l-kisbiet tagħha; dwar kif issaħħaħ l-għaqda monetarja u ekonomika; dwar kif tilqa’ għall-isfida tal-immigrazzjoni irregolari. Dan qalu l-Ewroparlamentari Alfred Sant, f’laqgħa organizzata minn ‘National Student Travel Foundation’ f’Dar l-Ewropa l-Belt Valletta. Dr Sant qal li fi żmien bħal dan hu importanti li kull komunità, kull nazzjon jagħraf kif iwassal il-messaġġ dwar x’jikkostitwixxu l-interessi vitali tiegħu. Dil-ħaġa ma jagħmluhiex biss il-politiċi imma jagħmluha wkoll iċ-ċittadini u s-soċjetà ċivili kull fejn ikollhom xi leħen fl-Ewropa.

Dr. Sant qal li hu vitali li kulħadd jifhem xinhu l-interess nazzjonali, imma li wkoll ikun jaf kif jesprimih b’mod li jiftiehem minn soċjetajiet oħra. Huwa qal li laqgħat, kuntatti u skambji ta’ veduti bejn żgħażagħ u ċittadini Maltin, kif imħeġġa matul is-snin, bix-xbieki ta’ komunikazzjoni li joħolqu, huma kruċjali biex iwasslu dal-messaġġ. Għalhekk hi ħaġa tajba li l-kuntatti u linji ta’ komunikazzjoni mibnija b’dal-mod matul is-snin, jiġu issa mogħtija n-nifs biex minflok jintesew, jibqgħu ħajja u attivi.

Il-laqgħa ġiet indirizzata wkoll mill-MEPs Roberta Metsola u Therese Commodini Cachia waqt li fost il-mistidnin kien hemm l-ex Prim Ministru Lawrence Gonzi u Francis Zammit Dimech MP.