L‑INTERESSI TAL‑ĦADDIEMA : IL‑PRIJORITA’ TAS‑SOĊJALISTI EWROPEJ

Il-prijorita` tas-Soċjalisti Ewropej għandha tkun l-interessi tal-ħaddiema Ewropej u jkun tajjeb li jidhru li qed jagħmlu dan. Dan qalu l-Kap tad-delegazzjoni Laburista Maltija lill-kapijiet tad-delegazzjonijiet nazzjonali u lill-membri tal-Bureau tal-S&D fi Brussell. Dr Sant, li kien qed jindirizza laqgħa li fiha ġew diskussi l-aħħar żviluppi politiċi fl-Ewropa, qal li l-votanti madwar l-Ewropa qed jirrealizzaw li meta l-għażla tkun bejn ‘Ewropa’ u l-interessi tal-ħaddiema Ewropej, il-Partiti Soċjalisti u l-S&D qed jagħżlu l-‘Ewropa’

Is-Soċjalisti Ewropej qed jagħtu l-impressjoni li ma għandhomx il-proposti tagħhom dwar dak li qed iseħħ bħalissa. Il-perċezzjoni hija li ħafna drabi qed nimxu wara l-istess politika tal-lemin, u xi minn daqqiet nirreaġixxu biss għall-bidliet li qed iseħħu kontinwament fil-kontinent. Ma nistax naqbel ma’ din l-atitudni. Is-Soċjalisti Ewropej mhux qed jirnexxielhom joħolqu politika li tirrispondi għall-bidliet li qed iseħħu fl-Ewropa, u li fl-istess ħin tħares l-interessi tal-ħaddiema. ‘In-nuqqas ta’ kredibilita` f’setturi differenti bħall-immigrazzjoni, il-kriżi tal-Greċja (fejn l-S&D qed taqbel ma’ ftehim li żgur mhux se jaħdem tajjeb) u s-sitwazzjoni tar-Russja u l-Ukraina għandhom l-istess kaġun. Wasalna sa hawn għax l-interessi tal-ħaddiema Ewropej ma ngħatawx prijorita` u għaliex ma ġewx imfassla strateġiji soċjalisti ġodda.’ Qal Dr. Sant.

Il-laqgħa tmexxiet minn Gianni Pittella, President tal-S&D