L‑UNGERIJA TIPPROVA TEVADI T‑TRATTAT TA’ DUBLIN

Il-gvern Ungeriż qed jibni ħajt fil-fruntiera mas-Serbja biex iwaqqaf in-numru dejjem jikber ta’ immigranti li qed jaqsmu l-Ungerija. Il-ħajt se jkun lest fl-aħħar ta’ Awwissu. Imma għaliex il-ħajt qed jinbena f’din il-fruntiera mas-Serbja biss? L-immigranti jivvjaġġaw mijiet ta’ mili biex jidħlu l-Ewropa. Ħajt li huwa twil ftit aktar minn 100 mil mhux se jwaqqafhom. Allura l-Ungerija għaliex qed tibni dan il-ħajt?

L-għan hu li jiddevja l-immigranti lejn il-Kroazja u r-Rumanija li huma membri tal-UE. Skont ir-regolamenti tat-trattat ta’ Dublin, l-ewwel stat li fuqu jirfsu l-immigranti huwa responsabbli biex jipproċessa t-talbiet tal-istess immigranti u jkun responsabbli għalihom. Billi tiddevja l-immigranti, l-Ungerija tevadi l-obbligazzjonijiet tat-trattat ta’ Dublin.

It-trattat ta’ Dublin jisħaq li l-istat li hu responsabbli għall-immigranti jrid jipprovdi livell ta’ għixien diċenti, jiggarantixxi saħħa fiżika u mentali lill-immigranti, u liberta`. L-immigranti ma jistgħux ikunu miżmuma f’ċentru ta’ detenzjoni magħluq sakemm it-talba tagħhom tkun ipproċessata imma għandhom jingħataw kenn, pariri legali u servizzi mediċi. F’temp ta’ disa’ xhur l-adulti għandhom jitħallew jidħlu fid-dinja tax-xogħol u l-minuri għandhom jiddaħħlu fl-iskejjel fi żmien tliet xhur.