L-EBDA GARANZIJA  DWAR PENSJONIJIET U INSURANCES WARA L-BREXIT

Il-Viċi President tal-Kummissjoni Ewropea Waldis Dombrovskis qal li l-UE ma tistax tagħti garanziji li – irrispettivament mir-riżultati tan-negozjati dwar il-Brexit – iċ-ċittadini tal-UE b’insurance privata u b’kuntratti ta’ pensjoni ma’ kumpaniji Britanniċi jkunu mħarsa u li jibqgħu jgawdu l-intitolamenti ta’ dak li ħallsu u dak li qegħdin iħallsu. Dombrovskis kien qed jirreaġixxi għal kummenti diretti ta’ Alfred Sant fil-Kumitat Ekonomiku u Monetarju tal-Parlament Ewropew (ECON) li ddiskuta l-istabbilita` finanzjarja fl-Ewropa.

Dombrovskis qal li n-negozjati għadhom għaddejjin, baqa’ l-mistoqsijiet u r-regolaturi qegħdin janalizzaw il-kontinwita` tal-kuntratti.

Dr Sant qal lil Dombrovskis li l-kontinwita` tal-kuntratti saret kwistjoni ewlenija tal-Brexit għaliex il-ftehimiet eżistenti huma strutturati li jagħtu l-awtorizzazzjoni tal-kumpaniji li joperaw in-negozji fl-istati membri tal-UE.

Alfred Sant qal li għad hemm xettiċiżmu fl-UE dwar il-‘crypto-currencies’, bl-enfasi tkun aktar fuq ir-riskji milli fuq l-opportunitajiet.

“Mill-aspett pożittiv, x’inhuma l-vantaġġi fuq livell tal-UE għall-avvanzi tal-‘crypto-currency’ fis-swieq finanzjarji?  Alfred Sant staqsa lil Dombrovskis.

Dombrovskis qal li l-Bank Ċentrali Ewropew jenfasizza li l-Ewro hija l-unika munita fl-UE. “Il-‘crypto-currencies iridu jkunu suġġetti għar-regoli ta’ kontra l-ħasil ta’ flus.” qal Dombrovskis.