L-EBDA SAJD TAL-MARLOZZ QRIB TAGĦNA

Il-Kummissjoni waqqfet is-sajd bit-tkarkir tal-qiegħ fil-Mediterran, f’żona bejn l-Italja, Malta u t-Tuneżija. L-għan huwa li tiżdied il-popolazzjoni tal-ħut, fosthom tal-marlozz li kien qed jinqabad fi kwantitajiet mhux sostenibbli. Se jkunu wkoll protetti l-gambli r-roża li issa se jkunu salvati 60% f’dawn l-inħawi tal-Mediterran. Il-qroll u l-ħxejjex li jikbru fil-qiegħ ta’ din iż-żona se jkunu mħarsa wkoll b’did-deċiżjoni.

Iż-żona protetta tlaħħaq l-1, 493 kilometru kwadru.

Il-Kummissjoni saħqet dwar l-importanza ta’ pjan għal din iż-żona, bi grupp ta’ ħidma li jispezzjona l-andament tas-sajd u l-istokks tal-ħut. Saħqet ukoll li l-maġġor parti tas-sajd f’din iż-żona jsir minn sajjieda fuq skala żgħira. Għalhekk ġie deċiż li jinħoloq grupp ta’ ħidma bl-għan li jinstabu miżuri li jgħinu lis-sajjieda tradizzjonali.