L-ECON MAQTUGĦ MIR-REALTAJIET EKONOMIĊI TAL-BLIET U RĦULA EWROPEJ

Alfred Sant qal li d-deliberazzjonijiet tal-ECON, responsabbli mill-politika ekonomika u finanzjarja tal-Unjoni Ewropea, huma wisq iggwidati mit-twemmin ta’ nies maqtugħin mill-ħajja ekonomika u finanzjarja fil-bliet u rħula Ewropej. Dr Sant, membru tal-ECON (Kumitat Ekonomiku u Monetarju tal-Parlament Ewropew),  kien mistieden jindirizza seminar organizzat dwar il-prijoritajiet tal-ECON mill-‘British Chamber of Commerce’ tal-Belġju fil-Parlament Ewropew.  Huwa qal li l-problema fundamentali hija kif il-prijoritajiet tal-ECON jinftehmu miċ-ċittadini u l-operaturi tan-negozju fil-pajjiżi Ewropej biex dawn jiggwidaw lill-ECON x’inhu fl-interess tagħhom.

Alfred Sant qal li ma jaqbilx ma’ aktar integrazzjoni federali tal-UE, qabel jittieħdu passi biex ipattu għad-diverġenzi strutturali dejjem jikbru fiż-żona Ewro. Dawn id-diverġenzi qed jiżdiedu bejn it-Tramuntana u s-Sud u bejn il-Lvant u ċ-ċentru tal-Ewropa. L-MEP Malti tkellem kontra r-riġidita` tal-politika ta’ one-size-fits-all li qed tikkaratterizza t-tmexxija taż-żona Ewro.