L-ESKLUŻJONI TAN-NISA XXEKKEL L-IŻVILUPP TAS-SOĊJETA’

L-esklużjoni tan-nisa minn pożizzjonijiet operazzjonali u ta’ deċiżjoni xxekkel l-iżvilupp tas-soċjeta’. Dan qalu Dr. Alfred Sant, il-Kap tad-Delegazzjoni Laburista fil-Parlament Ewropew meta tkellem favur ‘Direttiva għan-Nisa fil-Bordijiet’. Dr. Sant qal li jaqbel ma’ dil-proposta mhux għal raġunijiet ekonomiċi biss. ‘Ma jagħmilx sens għal ebda korporazzjoni li tutilizza biss nofs il-magni li jkollha għad-dispożizzjoni tagħha. Dan japplika wkoll għall-‘magni umani’. In-nisa kienu qed jiġu esklużi minn pożizzjonijiet operazzjonali u ta’ deċiżjoni għal raġunijiet ideoloġiċi. Dan kien qed ixekkel l-iżvilupp sħiħ ta’ soċjetajiet, ditti u gvernijiet.’ F’Novembru 2012 il-Kummissjoni Ewropea ressqet proposta għal Direttiva biex jitjieb il-bilanċ fost managers mhux-eżekuttivi magħrufa bħala ‘Women on Boards’. Dan wara talba tal-Parlament biex il-KE tipproponi kwota ta’ 40% sas-2020.

Dr. Sant qal li l-kwoti kienu l-għodda biex jagħmel tajjeb għal dax-xkiel.  It-titjib fil-produttivita` jkun żgurat bl-implimentazzjoni effettiva li s-sessi jingħataw l-istess opportunitajiet. B’hekk, wara ftit, il-kwoti jsiru affarijiet tal-passat. Dawn kienu effettivi fuq livell operattiv.  Imbagħad isiru effettivi wkoll fuq pożizzjonijiet eżekuttivi, fejn jittieħdu d-deċiżjonijiet.

‘Qed nitkellem mill-esperjenza.’ Qal Dr. Sant. ‘F’Malta il-Partit Laburista introduċa kwoti fl-elezzjonijiet fil-Konferenza Ġenerali u l-Eżekuttiv Nazzjonali. Wara 15-il sena, il-kwoti ma kienx hemm aktar bżonnhom. L-ugwaljanza bejn is-sessi bdiet tinkiseb awtomatikament fil-proċess ‘normali’ f’dawn l-istituzzjonijiet. Kien hemm titjib fit-tħaddim tagħhom. Iżda fuq livell tal-kumitat amministrattiv tal-partit ma daħħalniex kwoti. Dan kien żball. Iddominat mill-irġiel, l-effettivita` tal-kwoti f’dan il-livell, kienet baqgħet miftuħa għad-diskussjoni’, irrimarka Dr. Sant.