L-EWRO INDISPENSABBLI GĦAS-SUQ UNIKU

Il-Ministru tal-Affarijiet tal-UE tal-Gvern ġdid Taljan Paolo Savona qal li l-ewro hija “indispensabbli għas-suq uniku” u qal li l-Ewro għandha aspetti pożittivi.  Savona għamel dawn il-kummenti waqt li kien qed jippreżenta l-awtobijografija tiegħu f’Ruma. Ħafna interpretaw din l-istqarrija bħala tentattiv biex il-Gvern Taljan jikkalma s-swieq finanzjarji mill-inċertezza li qed tikkaġuna t-tmexxija l-ġdida fl-Italja.

Savona qal li jekk wieħed irid suq wieħed, jeħtieġ li jkollu munita waħda. “Il-pożizzjoni tiegħi hija li l-binja tal-Ewro hija binja limitata, li għandha tiġi perfezzjonata”.

Savona żied jgħid li l-Bank Ċentrali Ewropew għandu jkollu statut simili ta’ dak tar-Riżerva Federali.

Il-Popolisti fl-Italja kienu għamlu kampanja kontra l-ewro fil-kampanja elettorali aktar kmieni dis-sena.