L-EWROPA TEĦTIEĠ POLITIKA EKONOMIKA GĦALL-ISFIDI TAL-LUM

L-Ewropa teħtieġ politika ekonomika u finanzjarja skont l-isfidi tal-lum u ma tistax tibqa’ tiffissa fuq il-problemi li nqalgħu fl-2008. Dan qalu Dr Alfred Sant b’reazzjoni għar-rapport dwar l-implimentazzjoni tal-prijoritajiet tal-2015 dwar il-koordinament tal-politika ekonomika. Dr. Sant qal lill-Parlament Ewropew li kriterji ta’ ‘one size fits all’, bħal fil-kas tal-pensjonijiet, qed jiżdiedu bil-kbir. Il-kunsiderazzjonijiet soċjali, li qabel kienu s-sinsla tal-politika ekonomika Ewropea, issa qed ikunu mwarrba ta’ spiss. Dr Sant emfasizza il-ħtieġa biex dan jinbidel.

Fil-preżent l-istati membri jridu jimxu ma’ regoli li fil-prattika jimponu aktar issikkar mir-regoli li għandhom l-istati fl-Istati Uniti b’sistema federali. ‘Dan mhux il-kas tal-UE’ qal Dr Sant. Regoli oħra, bħall-Unjoni Bankarja, għalkemm huma meħtieġa, daħħlu spejjeż ġodda u dewmien fiċ-ċirkolazzjoni tal-flejjes.

Dr Sant qal li t-tkabbir fl-Ewropa baqa’ fraġli. ‘Minkejja l-programm ta’ ‘quantitative easing’ tal-Bank Ċentrali Ewropew, il-President Mario Draghi reġa’ qal li lest li jagħmel minn kollox biex is-sistema tqum fuq saqajha. Li jagħmel din l-istqarrija darba kien meħtieġ; li kellu jirrepetiha jfisser li ma għadhiex effettiva. Għalhekk jeħtieġ nevalwaw b’mod kritiku is-sistema ta’ sorveljanza tas-semestru. Il-proċeduri tagħna kienu mfassla biex iwaqqfu diżastri finanzjarji fost l-istati membri. F’dan irnexxielhom jiżguraw li metodi bbażati fuq ir-regoli u kompatibbli mas-suq ħieles, ikunu applikati fl-istati nazzjonali kollha. Madanakollu, dawn ir-regoli ma wasslux għal tkabbir ekonomiku fil-livelli mixtieqa.’ Qal Dr Sant.

Ara l-intervent ta’ Dr Sant billi tagħfas din il-link:

https://www.youtube.com/watch?v=xlUQBSDrUoo