L-EWWEL JIĠBRU L-FATTI, IMBAGĦAD JIKKONKLUDU

Illum tasal Malta delegazzjoni tal-Parlament Ewropew biex tinvestiga s-sitwazzjoni dwar l-istat tad-dritt f’pajjiżna. Din iż-żjara qed issir fuq proposta tal-Gvern Malti biex id-deputati Ewropej ikunu jistgħu jaraw b’għajnejhom, f’pajjiżna stess, u jagħmlu l-iskrutinju tagħhom dwar kemm huma minnhom l-allegazzjonijiet li saru kontra l-Gvern Malti.

Fost dawk li se jżuru Malta hemm Deputati Ewropej li diġa` tkellmu b’mod abbużiv dwar pajjiżna.  Dawn se jiltaqgħu ma’ ħafna fostna li diġa` huma preġudikati kontra l-Gvern Malti, min għal raġuni min għal oħra. Huwa importanti li d-delegazzjoni tesplora r-realtajiet ta’ pajjiżna, tfittex il-fatti u mbagħad tasal għall-konklużjonijiet tagħha. Ma jistax isir bil-maqlub. Ma jistgħux l-ewwel ifajru allegazzjonijiet bla bażi, imbagħad jipprovaw joħolqu l-fatti biex jiġġustifikaw l-attakki tagħhom.

Fl-aħħar ġranet rajna li wħud mill-Ewroparlamentari kienu biss interessati fl-aġenda partiġġjana tagħhom. Kien eħfef għal dawn li jinjoraw ir-realtajiet ta’ pajjiżna biex jiżirgħu d-dubji dwar il-mottivi tal-Gvern Malti. Dan il-Gvern ġie ri-elett b’maġġoranza assoluta li l-ebda partit fil-Parlament  Ewropew  m’għandu.  Bis-saħħa tiegħu Malta kisbet l-ogħla rata ta’ tkabbir ekonomiku fl-Ewropa kollha waqt li baqgħet tiżgura li tkun irrispettata s-saltna tad-dritt u l-liberta` tal-espressjoni.

Bl-ebda mod m’għandna nappoġġjaw lil min għandu kull interess li jattakka s-sistema tat-tassazzjoni u tas-settur finanzjarju f’pajjiżna li jammonta għal 20% tal-ekonomija tagħna. Dak li ħloqna flimkien irridu nibżgħu għalih flimkien.