L-IMF OTTIMISTA DWAR IŻ-ŻONA EWRO

Id-direttriċi tal-Fond Monetarju Internazzjonali (IMF) Christine Lagarde uriet l-ottimiżu tagħha, minkejja xi diffikultajiet dwar is-sitwazzjoni ekonomika taż-żona ewro, meta ppreżentat ir-riżultati annwali tal-Fond Internazzjonali fuq iż-żona ewro.

Lagarde qalet li ż-żona ewro qed tirkupra minħabba l-ħolqien tax-xogħol u żieda fid-domanda domestika, li skont ir-rapport dawn qed iwasslu biex iddur ir-rota tal-ekonomija. Hi qalet li dan il-progress iwassal biex l-IMF iżid it-tbassir ekonomiku tiegħu għas-sena 2017/2018.

L-IMF jirreferi għall-ambjent politiku favorevoli u l-opportunita` għall-aktar integrazzjoni ekonomika u saħaq dwar l-iffinalizzar tal-Unjoni Bankarja bil-ħolqien ta’ skema ta’ garanziji għad-depożiti bankarji Ewropej, il-ħolqien ta’ suq kapitali komuni u l-ħolqien ta’ baġit komuni.

L-IMF innota l-isfidi li qed taffaċċja ż-żona ewro, bħal konverġenza fid-dħul fost id-dsatax-il stat membru, li f’dawn l-aħħar snin staġnaw, u taw lok għal żieda fil-frustrazzjoni tal-klassi tan-nofs f’ħafna pajjiżi.