L-IMMIGRAZZJONI FUQ FOMM KULĦADD

Fl-aħħar summit il-mexxejja Ewropej iffukaw fuq il-kriżi tal-immigrazzjoni u fuq il-protezzjoni tal-fruntieri esterni tal-UE. Huma insistew li jsiru kontrolli sistematiċi tal-immigranti u reġgħu tkellmu dwar ir-rilokazzjoni ta’ 160,000 immigrant fil-pajjiżi tal-UE. Il-mewġ tal-immigranti laħaq l-4,000 persuna kuljum.

Il-Kummissjoni Ewropea ħabbret proposti ġodda dwar il-ħarsien tal-fruntieri, proposti li jagħtu d-dritt lill-Unjoni Ewropea biex tieħu azzjoni anki jekk l-istat membru kkonċernat ma jkunx talab l-intervent jew l-għajnuna tagħha. Dan l-arranġament qed ikun ikkunsidrat bħala telf mis-sovranita` tal-pajjiżi membri. Dwar dan diġa` tkellmu Alfred Sant, Kap tad-Delegazzjoni Laburista fil-Parlament Ewropew u l-Prim Ministru Joseph Muscat. Sant u Muscat qalu li mhux aċċettabbli li tintilef is-sovranita` fuq dan il-punt.

Il-President tal-Kummissjoni jixtieq li din il-proposta tkun aċċettata sa Ġunju tal-2016. Il-Kummissjoni wiegħdet li se tippreżenta wkoll reviżjoni tar-regoli ta’ Dublin dwar id-dritt għall-ażil kif ukoll pakkett dwar l-immigrazzjoni legali.

S’issa ma ntlaħaq l-ebda qbil imma l-mexxejja tal-pajjiżi ftiehmu li jieħdu pożizzjoni dwar il-proposti tal-Kummissjoni sal-aħħar ta’ Ġunju. Sakemm il-mexxejja jiddiskutu u jiddeċiedu għandhomx jittieħdu xi miżuri biex forsi jitjiebu l-kontrolli f’ċertu żoni tal-fruntieri esterni taż-żona Schengen.