L-IMPATT INIZJALI TAL-BREXIT

 

Uffiċċjali tal-Bank Ċentrali Ewropew huma tal-fehma li l-impatt inizjali tal-Brexit se jinħass fil-limiti tar-Renju Unit stess għalkemm xorta għad hemm inċertezza dwar l-impatt tal-vot Brittanniku fuq l-ekonomija globali fil-futur. Fuq dan il-ħsieb il-Bank Ċentrali Ewropew ma biddel xejn mill-politika attwali tiegħu, li fost miżuri oħra bħala stimolu għall-ekonomija jixtri €80 miljun f’bonds fix-xahar. L-uffiċċjali żguraw lis-swieq li jżidu l-istimoli skont kif meħtieġ. Għalissa l-bank qed jistenna li jiġbor aktar informazzjoni dwar l-impatt tal-Brexit.

Is-swieq finanzjarji rreaġixxew tajjeb għall-ewwel impatt tal-Brexit iżda qed jitqanqal id-dubju fuq kif dan il-vot se jaffettwa s-swieq Ewropej fuq tul ta’ żmien. Il-ħruġ tar-Renju Unit mill-UE ifisser il-ħruġ ta’ dan il-pajjiż mis-suq ħieles. Ir-relazzjonijiet ta’ kummerċ il-ġodda jeħtieġu negozjati friski. Il-proċess jista’ jieħu t-tul, saħansitra s-snin. Dan iħalli lin-negozju fl-inċertezza. Sitwazzjoni bħal din tista’ taffettwa l-ekonomija globali fil-fond b’modi li mhux neċessarjament jistgħu jkunu mbassra mill-esperti finanzjarji.

L-aġir tal-Bank Ċentrali Ewropew li jrid jistenna aktar informazzjoni jikkuntrasta dak tar-Riżerva Federali tal-Istati Uniti li qed taħseb biex iżżid ir-rati ta’ interessi li bħalissa qegħdin baxxi ħafna. Ħafna jsostnu li l-Bank Ċentrali Ewropew se jkollu eventwalment iżid l-istimoli tiegħu wkoll. Bħalissa id-19 il-pajjiż li jużaw l-ewro raw tkabbir ta’ 0.3% fit-tieni kwart ta’ din is-sena, inflazzjoni ta’ 0.2%  li hija kkunsidrata baxxa u rata ta’ qgħad ta’ 10.1%.