L-ISFIDI TA’ MALTA FL-IMMANIĠJAR TAL-ISKART

Alfred Sant faħħar l-impenn tal-Gvern għall-inizjattivi li jagħtu spinta lil Malta fil-qasam tal-immaniġjar tal-iskart u qal li dan is-settur jippreżenta żewġ sfidi kbar li ġew injorati mill-amministrazzjonijiet preċedenti. L-ewwel sfida hija l-ħolqien ta’ landfill għal perijodu ta’ żmien qasir li takkomoda l-iskart preżenti u tal-futur sakemm l-impjant meħtieġ għall-ipproċessar tal-iskart jibda jaħdem sew. It-tieni sfida hija l-organizzazzjoni serja tal-iskart domestiku u kummerċjali.

Wasteserv stiednet lill-Kap tad-Delegazzjoni Laburista fil-Parlament Ewropew biex iżur il-Kumpless Ambjentali fil-Magħtab li jħaddan fih l-landfill rijabilitata tal-Magħtab, il-landfills attivi ta’ Żwejra u tal-Għallis u l-Malta North Facility. Iċ-Chairman David Borg u s-CEO Tonio Montebello mxew ma’ Alfred Sant sal-Engineered landfill tal-Għallis li qed timtela b’rata mgħaġġla ħafna minħabba l-ammont sostanzjali ta’ skart li qed jinħoloq. Malta hija waħda mill-ftit pajjiżi Ewropej li tiddependi ħafna mill-metodu ta’ landfilling biex tiddisponi mill-iskart tagħha.

Dr Sant qal li l-fabbrika ‘l-ġdida’ li tipproċessa l-iskart il-ġdid wara li tisseparah f’żewġ gruppi differenti, qed tagħmel xogħol siewi ħafna. Jekk ikun hemm faċilita` oħra li topera magħha, tinħoloq l-opportunita` biex l-iskart kollu jiġi pproċessat fuq gżiritna f’post wieħed, bl-inqas impatt negattiv fuq l-ambjent, qal Dr Sant.