L-ISTABILITA’ TAL-EWRO TIDDEPENDI MILL-ITALJA

Il-‘Eurogroup’ esprimiet it-tħassib tagħha dwar il-Budget tal-Italja għall-perjodu 2019-2021. Mario Centeno, Chairman tal-Eurogroup qal li trid tittieħed azzjoni dwar l-effetti tal-Budget Taljan  fuq iż-żona Ewro.

“L-Italja trid turi li tinsab f’pożizzjoni li tippreżenta finanzi pubbliċi sodi u sostenibbli. Aħna qegħdin dsatax-il pajjiż fiż-żona Ewro u kollha niddependu minn xulxin. L-istabilita` tal-Ewro tiddependi mill-iżviluppi fl-Italja,” spjega l-Ministru Portugiż.

Il-Gvern Taljan qal li d-defiċit se jibqa’ 2.4% tal-Prodott Gross Domestiku għas-sentejn li ġejjin. Iżda dan imur kontra l-impenji li kien diġa` ħabbar il-Gvern Taljan fix-xhur li għaddew.

Pierre Moscovici Kummissarju tal-Finanzi qed ikun paċenzjuż u mħasseb għal dawn l-iżviluppi.

“Defiċit ta’ 2.4% huwa devjazzjoni sinjifikanti minn defiċit ta’ 1.6% li kont iddiskutejt ma’ Giovanni Tria.”

Tria, il-Ministru tal-Finanzi Taljan, ma jaqbilx mat-tħassib tal-esponenti taż-żona ewro.

Il-Kummissjoni Ewropea se jkollha kopja tal-abbozz tal-Budget Taljan sal-15 ta’ Ottubru.

Il-gvern Taljan għandu dejn ta’ €2300 biljun, it-tieni l-akbar dejn ta’ stat fiż-żona ewro wara l-Greċja.

Il-Ministru tal-Finanzi ta’ Spanja Nadia Calviño wkoll esprimiet it-tħassib tagħha.

“Ħadd ma jgawdi bl-instabilita`, wisq anqas l-Italja,” qalet il-Ministru Spanjola.