L-ISVEZJA TĦEJJI GĦALL-ĦOFRA TAL-BREXIT

L-Isvezja qalet li l-flejjes Ewropej għandhom imorru f’oqsma bħall-immigrazzjoni u s-sigurta` aktar milli f’għajnuna għas-settur tal-biedja. Il-pagamenti tal-Unjoni lejn l-istati membri għandhom isiru biss bil-kundizzjoni li l-istat membru jaqbel mal-politika Ewropea tal-immigrazzjoni. Il-gvern Svediż qal li l-baġit tal-Unjoni Ewropea irid ikun iżgħar minn dak attwali u l-kontribuzzjoni tal-Isvezja trid tibqa’ baxxa.

L-Isvezja diġa` qed tipprepara għan-negozjati tal-baġit tal-Unjoni Ewropea li mistennija jibdew fl-2018. Bit-tluq tar-Renju Unit mill-Unjoni qed ikun imbassar vojt fil-baġit Ewropew ta’ €10 biljun ewro fis-sena. Dan qed iħasseb lill-istati membri kollha.

Fiż-żmien li ġej l-istati membri jridu jiddeċiedu jċekknux il-baġit Ewropew u jwettqu inqas proġetti, iżidux il-kontribuzzjoni ta’ kull pajjiż fil-baġit Ewropew jew jagħmlu ftit mit-tnejn.

F’każ li l-kontribuzzjoni ta’ kull pajjiż tiżdied, l-Isvezja mistennija ssir it-tieni l-aktar pajjiż li tikkontribwixxi fil-baġit tal-Unjoni Ewropea. Dan xejn m’hu qed jogħġob lil Prim Ministru Svediż Löfven.