L-ITALJA RIESQA LEJN RIĊESSJONI

Ġimgħat wara li ntlaħaq ftehim dwar il-baġit Taljan mal-Kummissjoni Ewropea, qed jidhru sinjali li t-tielet l-akbar ekonomija taż-żona ewro riesqa lejn riċessjoni. Il-Bank tal-Italja qed ibassar tkabbir ta’ bejn 0.6% u 1% din is-sena u s-sena d-dieħla.

Skont l-uffiċċju tal-istatistika Taljan il-pajjiż irreġistra tkabbir negattiv fit-tielet kwart tal-2018. Jekk iċ-ċifri jibqgħu l-istess, l-Italja tkun l-ewwel ekonomija taż-żona ewro li terġa’ tidħol f’riċessjoni wara perijodu pożittiv ta’ tkabbir.

Il-forzi ekonomiċi li qed idaħħlu lil Italja f’din it-tendenza huma t-tnaqqis fl-infiq domestiku u r-rata tal-qgħad.

Il-Gvern populist Taljan tlewwem mal-Unjoni Ewropea dwar il-baġit tal-2019 li mingħalih kien se jwassal biex jagħti l-istimolu meħtieġ biex iddur ir-rota tal-ekonomija Taljana.