L-OBESITA’: PRIJORITA’ TAL-PRESIDENZA MALTIJA

Is-Segretarju Parlamentari Chris Fearne qal li l-obesita` se tkun waħda mill-prijoritajiet ewlenin tal-Presidenza ta’ Malta tal-Kunsill tal-Ministri tal-Unjoni Ewropea bħal daż-żmien sena. Dr Fearne qal dan waqt Konferenza fi Brussell dwar l-obesita` organizzata mill-Assoċjazzjoni Ewropea tal-Istudju tal-Obesita` (EASO). Id-diskussjoni kellha l-għan li tinxtered l-informazzjoni u tiżdied il-kollaborazzjoni għal proġetti konġunti, kif ukoll biex jintlaħaq qbil dwar l-istrateġija biex l-obesita` tingħata aktar importanza fl-aġenda politika tal-UE. Dr Fearne kien mistieden jipparteċipa fil-Konferenza mill-Membru Parlamentari Ewropew Dr Alfred Sant.

Dr Fearne qal li fost affarijiet oħra, jkun tajjeb li ssir analiżi ta’ xi twettaq s’issa mill-istrateġija 2014-2020 dwar l-obesita` fit-tfal li tnediet mill-Presidenza Griega fl-2014. Hu qal li d-dijanjosi tal-obesita` ssir waqt eżamijiet mediċi oħra bħal tad-dijabete u d-depressjoni, imma qal li din il-kundizzjoni għandha tkun eżaminata għaliha nfisha, indipendentement minn problemi oħra. Dan minkejja li dawn il-kundizzjonijiet kollha jaffettwaw lil xulxin. Dr Fearne saħaq li l-obesita` għandha tkun rikonoxxuta bħala marda u allura għandu jkun hemm mod stabbilit ta’ kif għandha titfejjaq. Hu qal li jeħtieġ li jingħataw aktar fondi biex tiġi megħluba din il-kundizzjoni.

Dr Sant qal li l-iżvilupp ekonomiku fl-Ewropa wassal għal-livelli għoljin ta’ għixien u benefiċċji oħra li kulħadd igawdi minnhom. Dan kollu ħalla wkoll effetti negattivi. Waħda minnhom hija l-obesita`. Din tħasseb lis-soċjetajiet moderni, inklużi l-Ewropej, fejn il-faqar jew ir-riskju tal-faqar huwa komuni. L-Obesita` ma tolqotx lil min hu sinjur biss, tolqot ukoll lil min hu fqir. Il-kundizzjoni hija ta’ tħassib ukoll f’Malta.

‘Il-problema tal-obesita`għandha tkun fl-ogħla pjanijiet politiċi nazzjonali tal-pajjiżi. ‘Għandna nagħmlu l-ġlieda kontra l-obesita` prijorita` fil-politika tal-Unjoni Ewropea. L-obesita` trid tkun analizzata mill-angoli kollha, anki mil-lat ta’ dawk il-kumpaniji li jużaw strateġiji ta’ riklamar biex ibigħu l-‘fast foods’. Kif ukoll mil-lat ta’ ikel li uliedna jixtru fl-iskejjel,dak li jieklu d-dar u ankimil-lat ta’ ċittadin normali li għandu strateġiji limitati biex jgħix bid-dipressjoni. Wieħed ma jistax jinsa l-prevalenza tal-obesita` fost il-popolazzjoni f’livell soċjo-ekonomiku baxx. Il-Kummissjoni Ewropea kkonfermat li fl-Ewropa hemm relazzjoni bejn l-obesita` u dawk li jgħixu f’livell soċjo-ekonomiku baxx, partikolarment nisa u tfal.’

Dr. Sant qal li l-isfida li qed naffaċċjaw mhix waħda professjonali biss, l-anqas soċjali, politika jew ekonomika. Din l-isfida hija kumplessa u teħtieġ li tingħeleb bi strateġija ħolistika; strateġija li fost oħrajn teħtieġ tobba, psikologi, soċjologi, djetologi, ekonomisti u esperti tas-suq – kemm f’livell nazzjonali kif ukoll fuq livell Ewropew. Il-politiċi, fuq livell nazzjonali u fuq livell Ewropew, m’għandhomx jinjoraw din il-problema sempliċiment għax jaħsbu li ma jirbħux voti biha.