L-UE TRID TAGĦLAQ IR-ROTTA TAL-MEDITERRAN

Il-mexxejja Ewropej qablu li jsaħħu l-azzjonijiet tagħhom fil-Libja u fil-pajjiżi ġirien tagħha biex tingħalaq din ir-rotta għall-immigrazzjoni waqt li jżidu l-għajnuna għall-Italja fit-tmexxija tal-Mediterran ċentrali.

Il-pajjiżi membri qablu li jżidu l-fondi għall-Afrika. Bħalissa l-fond tal-Afrika jammonta għall-€175 miljun ewro, għalkemm il-KE kienet qed taspira għas-somma ta’ €1.8 biljun.

L-istati membri mistennija jilħqu kompromess fuq ir-riforma tat-trattat ta’ Dublin fl-ewwel sitt xhur tas-sena 2018. Il-President tal-Kunsill tal-UE Donald Tusk wiegħed li “sakemm inkun hawn jien, se nħares li jkun hawn l-għaqda”. Tusk kien qed jirreferi għall-pajjiżi tal-Visegrad (Polonja, Ungerija, Repubblika Ċeka u Slovakkja) li ma jaqblux mal-politika tal-KE meta fl-2015 b’maġġoranza kwalifikata ddeċidiet li l-istati membri jaċċettaw kwoti obbligatorji tal-immigranti mill-Greċja u l-Italja.