MA JAQBLUX DWAR IS-SANZJONIJIET RUSSI

Il-Litwanja qalet li s-sanzjonijiet fuq ir-Russja minħabba l-kunflitt tal-Ukraina għandhom jibqgħu fis-seħħ sakemm is-sitwazzjoni fil-pajjiż titjieb. Dan wara li s-Slovakkja sejħet biex l-UE tneħħi s-sanzjonijiet għax ‘qed iweġġgħu liż-żewġ naħat’ u m’hu qed jinfluwenzaw xejn fuq is-sitwazzjoni. L-UE imponiet sanzjonijiet fuq Moska fuq is-setturi tal-enerġija, il-finanzi u d-difiża wara l-anniħilazzjoni tal-Krimea f’Marzu 2014. F’Ġunju li għadda l-Unjoni qablet li testendi s-sanzjonijiet sal-aħħar ta’ Jannar.

Il-Litwanja qed tisħaq fuq aktar sanzjonijiet jekk li hemm fis-seħħ m’hux qed iħallu l-effett mixtieq. Gvernijiet tal-Punent u ta’ Kiev huma tal-fehma li għadu kmieni biex jitneħħew is-sanzjonijiet għax is-sitwazzjoni fl-Ukraina ma kkalmatx u r-Russja għadha involuta militarment. Huma qed jisħqu li r-Russja armat u appoġġjat separatisti ribelli fil-Lvant tal-Ukraina f’kunflitt li fih diġa` mietu 9, 000 ruħ f’sentejn.

L-Ungerija u r-Repubblika Ċeka jaqblu mas-Slovakkja u jixtiequ li s-sanzjonijiet jispiċċaw.

Il-Kanċilliera Ġermaniża Angela Merkel qalet li ma hemmx raġuni valida biex is-sanzjonijiet fuq ir-Russja jitneħħew ġaladarba r-Russja mhux qed timplimenta l-ftehim ta’ Minsk.