MERKEL U MACRON F’KUNTATT MA’ TRUMP DWAR IL-POLITIKA KUMMERĊJALI

Filwaqt li l-Kummissjoni Ewropea qed tipprova tilħaq kompromess mal-Istati Uniti biex tiżgura li l-UE tibqa’ eżentata mid-dazji fuq l-azzar u l-aluminju, il-Ġermanja u Franza qed jagħmlu l-almu tagħhom biex iberrdu t-tensjoni ma’ Washington.  Il-Kanċilliera Ġermaniża Angela Merkel u l-President Franċiż Emmanuel Macron tkellmu bit-telefon mal-President tal-Istati Uniti Donald Trump biex tinstab soluzzjoni bejn l-UE u l-Istati Uniti dwar il-politika kummerċjali.

“Trump u Merkel saħqu dwar il-kooperazzjoni bejn l-Istati Uniti u l-Ġermanja biex jingħaqdu flimkien kontra prattiċi ekonomiċi inġusti miċ-Ċina; dwar l-akkwist illegali ta’ propjeta` intellettwali u biex it-tariffi ikunu aktar ġust,” qalet il-White House.

Meta fit-23 ta’ Marzu l-Istati Uniti ħabbret it-taxxi fuq l-importazzjoni tal-azzar u l-aluminju, li għalihom l-UE hija eżentata sal-1 ta’ Mejju, il-Ministru tal-Ekonomija Ġermaniż Peter Altmaier mar Washington għal diskussjonijiet. Warajh marret il-Kummissarju tal-Kummerċ tal-UE Cecilia Malmström.

Ftit ġranet wara Trump tkellem ukoll ma’ Macron dwar il-kummerċ bejn l-Istati Uniti u l-UE, u dwar “il-passi li jmiss biex ikun indirizzat il-kummerċ inġust taċ-Ċina”.

“L-esportazzjoni tal-UE tal-aluminju u l-azzar mhumiex ta’ theddida għas-sigurta` nazzjonali tal-Istati Uniti u allura ma għandhomx jintlaqtu minn dazji. Jeħtieġ jissaħħu r-regoli internazzjonali li jiżguraw kompetizzjoni ġusta fil-kummerċ dinji”. qal Macron.

Malmström u s-Segretarju tal-Kummerċ Amerikan Wilbur Ross fetħu djalogu dwar “kwistjonijiet ta’ interess komuni” li jinkludu l-ġlieda kontra l-produzzjoni żejda ta’ azzar u aluminju.

Iż-żewġ naħat qablu li se jibqgħu fi djalogu fil-ġimgħat li ġejjin.