MHUX KREDIBBLI MILL-BIDU SAL-AĦĦAR

Alfred Sant qal li l-eżerċizzju tal-Parlament Ewropew biex “jinvestiga” l-istat tad-dritt f’Malta baqa’ mhux kredibbli mill-bidu sal-aħħar. Il-ħidma tad-delegazzjoni tal-Parlament Ewropew kienet nieqsa mill-kriterji kollha li jagħmlu l-eżerċizzju kredibbli fejn tassew jitħaddem l-istat tad-dritt: kriterji li jiddeterminaw dak li bl-Ingliż jissejjaħ due process. Għalhekk ħidmietha mhijiex kredibbli, qal il-Kap tad-Delegazzjoni Laburista fil-Parlament Ewropew.

“Li jeżistu problemi fil-governanza tal-pajjiż u fil-kontrolli fuq il-korruzzjoni, hi ħaġa ċara. Iżda li dawn jiġu ffaċċjati bil-proċeduri tal-Parlament kif maħduma biż-żjara tad-delegazzjoni ta’ Diċembru li għadda hi redikolaġni.”

Dr Sant qal li l-membri tad-delegazzjoni assumew ir-rwol ta’ investigatur, xhud, prosekutur, ġurija u imħallef. Numru minnhom kienu ilhom protagonisti tal-kritika kontra Malta. Il-preżenza fosthom ta’ David Casa kien xempju tal-istil okkult li bih organizzaw xogħolhom. Dan bla ma nsemmu l-kwalità tan-nies li ltaqgħu magħhom, fosthom dawk mis-“soċjetà ċivili.”

Id-delegazzjoni qajmet mistoqsijiet importanti għal pajjiżna, imma qabilhom qajmuhom kummentaturi u kelliema minn diversi sezzjonijiet, xellug u lemin. Ir-rapport tagħhom, kif mistenni u kif stennew, qajjem furur fil-midja stampata u soċjali tan-nazzjon.