MHUX SE JINXTRAW AKTAR ĊEDOLI TAL-GVERNIJIET

Il-Bank Ċentrali Ewropew (BĊE) mistenni jimplimenta l-ewwel passi biex joħroġ mill-pjan li jixtri miljuni ta’ ċedoli tal-gvernijiet, magħruf bħala ‘quantitative easing’.

Dan il-programm tnieda sentejn ilu bl-għan li l-inflazzjoni tersaq qrib it-2%. Sal-aħħar ta’ Awwissu l-BĊE akkwista €1.689 biljun f’ bonds tal-gvernijiet u aktar minn €105 biljun ta’ bonds privati.

Il-President tal-BĊE Mario Draghi qal li l-ekonomija qed tirkupra u l-inflazzjoni fiż-żona ewro qed togħla (1.3% f’Lulju). Dawn is-sinjali huma b’saħħithom biżżejjed biex fil-ħarifa l-BĊE jibda joħroġ bil-mod mill-programm ta’ ‘quantitative easing’, qal Draghi.