MIBGĦUTA LURA L-MAROKK

Spanja bagħtet lura 116 immigrant lejn il-Marokk wara li daħlu bil-forza u b’mod illegali fuq it-territorju Spanjol ta’ Ceuta.

L-immigranti daħlu Ceuta wara li qabżu ċint bil-‘barbed-wire’ fuq il-fruntiera bejn il-Marokk u Spanja u attakkaw lil pulizija.

It-territorji Spanjoli ta’ Ceuta u Melilla huma l-uniku territorji tal-UE li jmissu bl-art mal-kontinent Afrikan. Kull sena immigranti Afrikani li jgħixu illegalment fil-Marokk jippruvaw jidħlu fl-Ewropa jew billi jixxabbtu mal-ħitan jew billi jgħumu tul il-kosta.

Il-Gvern Spanjol qal li t-tkeċċija tal-immigranti hija ‘legali’. Il-Marokk indika li kien se jaċċetta lil dawn in-nies. L-immigranti għandhom avukat, interpretu u għajnuna medika.

Aktar minn 3, 100 immigrant daħlu Ceuta u Melilla fuq l-art mill-bidu ta’ din is-sena.

Aktar minn 25,000 immigrant daħlu Spanja bil-baħar. Spanja saret punt ta’ dħul ewlieni għall-immigranti Afrikani, wara l-Italja u l-Greċja.