‘NO COMMENT’

Kelliem għal Kummissjoni Ewropea u Kummissarju Ewropew għal Ġustizzja Vera Jourova għażlet li ma tikkummentax wara li Alfred Sant iddikjara li l-Kummissjoni taqbad ma’ banek żgħar fi stati membri żgħar bħal Malta, iżda tagħlaq għajnejha għall-atti kriminali li jsiru mill-banek Ewropej il-kbar. Il-KE qalet lil KYC 360, website finanzjarja li ‘Il-Kummissjoni ma tikkummentax fuq kummenti’.

KYC360 irrapportat li l-KE ġiet akkużata mill-ex Prim Ministru Malti li hija preġudikata dwar investigazzjonijiet ta’ attivitajiet ta’ ħasil ta’ flus.

“Alfred Sant semma speċifikament lill-Kummissarju Ewropew għall-Ġustizzja Vera Jourova, u qal li qatt ma ssemmi ġganti bankarji involuti fi skandli ta’ ħasil ta’ flus, bħal Deutsche Bank, iżda tagħżel minflok li tiffoka fuq banek żgħar ibbażati f’pajjiżi bħal Malta.”

Alfred Sant qal lil KYC360 li Jourova kienet kuntenta tiftaħ investigazzjoni b’ħafna pubbliċita`, għal każ relattivament żgħir tal-Bank Pilatus f’Malta kif ukoll fil-każ tas-settur finanzjarju relattivament żgħir ta’ Malta iżda m’għamlitx l-istess dwar Danske u Deutsche Bank.

Kemm Deutsche u kemm Danske Bank tħammġu fi skandli ta’ ħasil ta’ flus. Is-sena l-oħra Deutsche qabel li jħallas lil Awtoritajiet Brittaniċi u Amerikani s-somma ta’ €620 miljun  f’penalitajiet. Riċentement Danske Bank qal li l-fergħa tiegħu fl-Estonja ipproċessat madwar €200 biljun ta’ flus ta’ oriġini suspettużi fuq numru ta’ snin.