NOVEMBRU

Il-fjura li tissimbolizza x-xahar ta’ Novembru hija l-Chrysanthemum għax tkun għadha fl-aqwa tagħha f’dan ix-xahar. Din il-fjura hija l-iktar waħda li tinbiegħ fid-dinja kollha. Biss biss fi Franza jitqiegħdu madwar 25 miljun pott ta’ din il-fjura fuq l-oqbra Franċiżi. Assoċjata ħafna mal-mejtin, din il-fjura żgur ma għandhiex tingħata bħala rigal fl-ibliet Franċiżi. F’dawk Asjatiċi, minn fejn oriġinat il-fjura, il-fjura tissimbolizza ferħ, eleganza u eternita`.

Ix-xahar ta’ Novembru jimmarka wkoll avvenimenti interessanti.  Dan ix-xahar jimmarka l-ftuħ tal-Kanal ta’ Sueż kważi mija u ħamsin sena ilu, jimmarka l-assassinju ta’ John F. Kennedy, it-twelid ta’ Sir Winston Churchill u ta’ Johnathan Swift, l-awtur Irlandiż ta’ Gullivers’ Travel. F’Novembru tal-1922 l-arkeologu Ingliż Howard Carter u n-nies tiegħu daħlu fil-qabar tar-re Eġizzjan Tutankhamen. Dak inhar Carter sab qabar Eġizzjan li kien ilu magħluq għal kważi 3,000 sena. L-oġġetti prezzjużi li nstabu fil-qabar affaxxinaw lid-dinja kollha.