NUMRU REKORD TA’ IMMIGRANTI FUQ IX-XTUT TALJANI

In-numru ta’ immigranti li waslu fuq il-kosta Taljana f’Ottubru laħaq is-27, 500. Dan huwa livell rekord hekk kif in-numru rdoppja mix-xahar ta’ Settembru. Ħafna mill-immigranti huma min-Niġerja u l-Eritrea. Fl-2016 waslu l-Italja 159, 500 immigrant, 30% aktar mill-2015.

Fil-Lvant tal-Mediterran fl-istess xahar waslu 3, 100 ruħ fuq il-gżejjer Griegi. Mill-bidu tas-sena ’l hawn waslu 170, 000 immigrant li kważi kollha daħlu l-Greċja bejn Jannar u Marzu, qabel il-ftehim mat-Turkija. Ħafna minn dawn l-immigranti ġew mis-Sirja, l-Iraq u l-Afganistan.

Filwaqt li l-Greċja u l-Italja mifnija bil-wasliet, il-Ministri tal-Intern tal-pajjiżi membri ma qablux fuq riforma meħtieġa fit-trattat ta’ Dublin li jirregola r-responsabbiltajiet tal-pajjiżi dwar l-ażil. Bħalissa l-pajjiżi qed jopponu l-idea tal-Kummissjoni li f’kas ta’ emerġenza u wasliet kbar ta’ immigranti, jiskatta l-mekkaniżmu ta’ rilokazzjoni b’mod awtomatiku li jqassam l-immigranti fil-pajjiżi membri kollha.

Xi stati membri ma jaqblux mal-Presidenza Slovakka li tixtieq li l-pajjiżi jkollhom metodi oħra ta’ kif juru s-solidarjeta` pereżempju billi jikkontribwixxu finanzjarjament għall-immigranti.   Il-Ministru Malti tal-Intern Carmelo Abela qal li minflok solidarjeta` flessibbli hemm bżonn ta’ solidarjeta` effettiva b’mod permanenti.