NUMRU REKORD TA’ IMMIGRANTI GĦAL FRANZA

Franza laqgħet numru rekord ta’ 100,000 applikazzjoni għall-ażil fl-2017. Franza qed taffaċċja influss ta’ immigranti b’mod regolari iżda xorta għadha ’l bogħod miċ-ċifri fenomenali li laqgħet il-Ġermanja fl-2015. Bħalissa l-gvern Franċiż qed iħejji liġi dwar l-immigrazzjoni li qed tqanqal dibattiti sħan ħafna.

“Dan huwa livell storiku,” qal Pascal Brice, Direttur Ġenerali ta’ Ofpra, l-Uffiċċju Franċiż għall-protezzjoni tar-Refuġjati u Persuni mingħajr Stat. Fl-1981, l-ibgħad sena li għaliha l-Ofpra ppubblikat l-informazzjoni kien hemm inqas minn 20,000 applikazzjoni.

L-Abbozz ta’ liġi dwar l-ażil u l-immigrazzjoni, imħejji mill-Ministru tal-Intern Gérard Collomb, għandu jiġi ppreżentat fi Frar fil-Kunsill tal-Ministri u warajh mistenni proċess ta’ konsultazzjoni minħabba diverġenzi fl-opinjonijiet.

L-applikazzjonijiet għall-ażil is-sena l-oħra żdiedu bi 17%, u laħqu total ta’ 100,412, wara żieda ta’ 6.5% fl-2016. Żieda kostanti anki jekk l-influss mhux kbir b’mod eżaġerat. Franza hija fost dawk il-pajjiżi li jilqgħu l-aktar applikazzjonijiet għall-ażil, wara l-Ġermanja li din is-sena mistennija tilqa’ 200, 000 applikazzjoni. Skont ir-regola tat-trattat ta’ Dublin, l-ewwel pajjiż Ewropew li fih jinżlu l-immigranti għandu jipproċessa hu l-applikazzjonijiet għall-ażil. Gérard Collomb qal li kważi 52% tal-applikanti fi Franza jaqgħu taħt din il-proċedura ta’ Dublin. Il-Ministru tal-Intern qal li waħda mill-prijoritajiet tiegħu huwa t-trasferiment ta’ dawn l-immigranti lejn il-pajjiżi Ewropej li fihom rifsu l-ewwel. Ir-rata preżenti ta’ trasferiment bħalissa hija ta’ 10%.