OPRI TAL-ARTI JIFFINANZJAW IT-TERRORIŻMU

Il-Kummissjoni Ewropea qed tipproponi regoli ġodda biex titwaqqaf l-importazzjoni illegali u t-traffikar ta’ oġġetti kulturali minn barra l-UE, li sikwit huma marbuta mal-finanzjament tat-terroriżmu u attivitajiet kriminali oħra. Il-Kummissjoni tixtieq issaħħaħ il-pjan ta’ azzjoni tagħha fil-ġlieda kontra l-finanzjament tat-terroriżmu. Se twaqqaf it-traffikar ta’ oġġetti kulturali importati fl-UE li jkunu esportati illegalment mill-pajjiż tal-oriġini tal-oġġett.

Il-Viċi President tal-Kummissjoni Frans Timmermans qal, “Il-flus huma l-ossiġenu tal-organizzazzjoni terroristiċi bħad-Daesh. Qed nieħdu azzjoni biex naqtgħulhom is-sorsi tal-finanzjament tagħhom. Dan jinkludi l-kummerċ ta’ oġġetti kulturali għax it-terroristi jagħmlu l-flus billi jisirqu siti arkeoloġiċi. Billi ma nħallux lil dawn l-oġġetti jidħlu fl-UE, inkunu qed ngħinu biex naqtgħulhom dan is-sors ta’ finanzjament.”

Bħalissa l-UE tibbrojbixxi oġġetti mill-Iraq u s-Sirja imma għad ma hemmx qafas ġenerali fuq l-importazzjoni ta’ oġġetti kulturali. Ir-regoli attwali jistgħu xorta jservu lill-esportaturi u importaturi biex bil-profitti jiffinanzjaw attivitajiet illegali bħat-terroriżmu. Liġijiet nazzjonali differenti u ineffiċjenti juru l-ħtieġa ta’ azzjoni Ewropea f’dan il-qasam għal aktar konsistenza fil-fruntieri esterni tal-UE. Fost ir-regoli l-ġodda hemm sistema rigoruża ta’ ċertifikazzjoni li turi li l-oġġett ikun esportat b’mod legali minn terzi pajjiżi, u tinħtieġ liċenzja mill-awtoritajiet Ewropej kompetenti qabel ma jkun jista’ jiddaħħal oġġett fl-Ewropa. L-uffiċċjali tad-dwana se jkollhom il-poter iżommu l-oġġetti f’każ ta’ nuqqas ta’ dokumentazzjoni u provi ta’ dan it-tip.

Is-suq awtentiku u globali tal-arti u l-antikitajiet kellu bejgħ stmat li jlaħħaq is-€56 biljun fl-2016.  Minn din is-somma is-suq Ewropew laħħaq id-€19-il biljun ewro. Ir-regolamenti l-ġodda issa jridu jgħaddu mill-Parlament Ewropew u mill-Kunsill tal-Unjoni Ewropea.