ORBAN IFITTEX L-APPOĠĠ TAL-ITALJA KONTRA L-IMMIGRAZZJONI

 

“Il-Polonja, Slovakkja, Repubblika Ċeka u dalwaqt anki l-Italja” se jingħaqdu mal-Ungerija fil-ġlieda kontra l-immigrazzjoni. F’diskors f’għeluq il-170 anniversarju mir-Rivoluzzjoni Ungeriża, il-Prim Ministru Ungeriż Victor Orban indirizza eluf ta’ Ungeriżi dwar il-ġlieda tiegħu kontra l-immigrazzjoni li ilu jwettaq sa minn mindu ħa l-poter fl-2010.

Bl-islogan ‘L-Ungerija l-Ewwel’, Orban attakka l-Unjoni Ewropea u l-‘imperu globalista’ li minnu tagħmel parti.

“Miljuni ta’ Ewropej immexxija minn sentimenti nazzjonali huma kontra ċ-ċittadini elitisti tad-dinja u kontra dawk li bidlu lil Ewropa mingħajr ma talbu l-opinjoni taċ-ċittadini Ewropej. Ejjew nkunu kburin li aħna konna l-uniku pajjiż fl-UE li staqsa lil niesu x’jaħseb dwar l-immigrazzjoni tal-massa”, qal il-Prim Ministru Ungeriż f’referenza diretta għar-referendum li sar f’pajjiżu fl-2016 dwar il-kwoti tal-immigranti imposti mill-Kummissjoni Ewropea.

Orban attakka kontinwament lil biljunarju Amerikan ta’ oriġini Ungeriżi George Soros, akkużat minn Orban li qed jappoġġja b’mod insidjuż kandidati oħra rivali tiegħu.

Orban huwa l-favorit li jerġa’ jirbaħ l-elezzjonijiet fl-Ungerija fl-4 ta’ April.