PAJJIŻI TAL-LVANT JITBEGĦDU MILL-ĠERMANJA

Is-Slovakkja, il-Polonja, l-Ungerija u r-Repubblika Ċeka qegħdin jitbegħu mill-pożizzjoni tal-Ġermanja dwar l-Immigrazzjoni. Il-Kapijiet ta’ dawn il-pajjiżi ‘l-ġodda’ tal-UE qegħdin jitkellmu fil-miftuħ kontra l-politika tal-immigrazzjoni li permezz tagħha l-UE laqgħet aktar minn miljun refuġjat is-sena li għaddiet.

Il-Prim Ministru tal-Islovakkja Robert Fico qal li l-Unjoni Ewropea għandha bżonn issejjaħ ‘summit’ biex titwaqqaf il-mewġa ta’ immigrazzjoni mhux kontrollata.

Il-Prim Ministri tal-Ungerija utal-Polonja wkoll tkellmu kemm-il darba fuq din il-linja u kkritikaw in-nuqqasijiet tal-UE li tipproteġi l-fruntieri esterni tagħha. Ikkritikaw lil Kanċilliera Angela Merkel minħabba l-atitudni liberali tagħha rigward l-immigranti.

Fico qal li l-immigranti qed ikunu trattati bħala ‘speċi protetta’ u sejjaħ għal azzjoni urġenti biex titwaqqaf l-immigrazzjoni. Fico qatt ma qabel mal-pjan ta’ rilokazzjoni tal-Kummissjoni Ewropea u mas-sistema tal-kwoti. Hu qal li mhux biss se jirrifjuta l-kwoti imma jirrifjuta wkoll li xi darba jieħu deċiżjoni li tista’ twassal biex tikber il-komunita` Musulmana f’pajjiżu. Hu qal li l-multi-kulturaliżmu ma ħadimx. ‘Ġaladarba tħalli l-immigranti jidħlu, taffaċċja ċertu problemi’. qal Fico b’referenza għall-istraġi li seħħet Pariġi f’Novembru u għall-avvenimenti f’Cologne.

L-Islovakkja hija pajjiż fil-parti kbira tiegħu Kattoliku b’popolazzjoni ta’ 5.5 miljun. Il-Misilmin huma ftit ħafna. L-Islovakkja ħadet biss 170 rifuġjat is-sena l-oħra. Il-Kummissjoni Ewropea qed titlob lil dan il-pajjiż jieħu 800 persuna li qed titlobha l-ażil.

Kliem Fico għandu l-appoġġ tal-Prim Ministru Ungeriż Viktor Orbán. Orbán talab lil UE biex tħallas għal bini ta’ ħajt fuq il-fruntiera tat-tramuntana tal-Ġreċja għax jemmen li t-€3 biljun ewro li l-UE se tippompja lit-Turkija biex twaqqaf l-immigranti mhux se jaħdem. Orbán kiseb ħafna appoġġ mill-poplu Ungeriż minħabba l-mod kif itratta l-problema tal-immigrazzjoni billi tella’ ħajt fil-fruntiera tal-Ungerija.

Il-Prim Ministru Pollakk Beata Szydlo akkużat lill-Ewropa tal-Punent u l-politiċi Ġermaniżi li ma ħadux il-problema tal-immigrazzjoni bis-serjeta`. Il-Prim Ministru tar-Repubblika Ċeka Bohuslav Sobotka sejjaħ għad-deportazzjoni immedjata u awtomatika ta’ dawk ir-refuġjati li jwettqu att kriminali fl-Ewropa.