PROPOSTI GĦALL-INVESTIMENT FL-ISTATI MEMBRI TAL-UE

Il-gruppi politiċi kollha fil-Kumitat tal-Affarijiet Ekonomiċi u Monetarji (ECON) għandhom jipprovaw jippreżentaw proposti validi dwar l-investiment, ibbażati fuq ir-rakkomandazzjonijiet speċifiċi għal kull pajjiż li fasslet il-Kummissjoni. Dan qalu Alfred Sant li bħala rapporteur għal S&D, ippreżenta rapport formali dwar ir-rakkomandazzjonijiet li l-Kummissjoni Ewropea tat lill-istati membri fl-2016.

Hemm l-argument li l-munita ewro tqanqal żbilanċi strutturali li jnaqqsu l-investiment u l-konsum. “Il-punt jibqa’ dan: fil-passat l-investiment f’dan il-kuntest mhux ottimali xorta kien aktar b’saħħtu milli huwa llum. Allura, nistgħu tal-anqas nipprovaw nilħqu l-livelli li kellna fil-passat, peress li l-esperjenza turina li nistgħu nilħqu livelli bħal dawn?” staqsa Dr Sant.

L-investiment pubbliku huwa f’livelli ħafna aktar baxxi minn dawk tal-Istati Uniti li taħbi l-investimenti pubbliċi wara t-tabelli tad-Difiża, r-Riċerka u l-Iżvilupp u talloka l-flejjes kemm fuq livell statali u kemm federali. “Hija ta’ tħassib din is-sitwazzjoni? L-investiment li hu l-aktar meħtieġ huwa dak privat. Imma l-investiment privat jirkeb fuq dak pubbliku. Inqas ma jkun hemm investiment pubbliku, inqas ikun hemm kunfidenza fin-negozji li tqanqal volumi akbar ta’ investiment privat.”

“Sa ftit żmien ilu, kienu jgħidulna li l-akbar problemi tal-SMEs kienu r-riġidita` tal-bank fuq is-self. Issa qed jintqal li l-problema hija li ma hemmx domanda biżżejjed biex intraprenditur ikun motivat jinvesti fi proġetti ġodda, speċjalment l-intrapriżi żgħar u medji. Il-problema għadha fir-riġidita` tas-self tal-bank, li fl-Ewropa, ngħidu x’ngħidu dwar l-unjoni tas-swieq kapitali, hija l-għodda li toħloq il-finanzjament għall-intrapriżi żgħar u medji.”

Dr Sant qal li l-politika ekonomika Ewropea komuni qed tqanqal l-inċertezza f’oqsma bħall-enerġija, l-ambjent, l-unjoni bankarja fi ħdan iż-żona ewro u l-immigrazzjoni. Lil hinn minn hekk, hemm ukoll l-inċertezzi politiċi, li tqanqlu aktar bil-Brexit, imma li huma wkoll frott ta’ kwistjonijiet politiċi li għadhom ma ssolvewx.

Din kienet l-ewwel darba li r-rapport ġie diskuss fuq livell ta’ kumitat. Ir-rapport ikun finalizzat f’Settembru wara aktar diskussjonijiet mar-rappreżentanti tal-gruppi politiċi l-oħra. Jittieħed vot għal adozzjoni tar-rapport fil-11 ta’ Ottubru 2016.

Tista’ ssegwi l-intervent sħiħ ta’ Dr Sant fl-ECON fuq il-link:

https://www.youtube.com/watch?v=WDa4lIRfxUc