QUO VADIS IL-BIEDJA EWROPEA?

L-Italja uriet it-tħassib tagħha għall-politika agrarja tal-Unjoni Ewropea. Dan wara li l-UE għamlet ftehim agrikolu mal-Ukrajna, Marokk, l-Afrika tal-Punent, il-Kanada, il-pajjiżi tal-Amerika Latina u l-Vjetnam. Bħalissa għaddejjin ukoll negozjati għall-kummerċ ħieles mal-Istati Uniti, l-Indja, iċ-Ċina u l-Ġappun.

L-Italja semmgħet leħinha hekk kif minħabba l-ftehim ta’ kummerċ, il-produtturi tat-tadam fl-Italja qed jaffaċċjaw kompetizzjoni mit-tadam tal-Marokk. Il-produtturi taż-żejt taż-żebbuġa għandhom kompetizzjoni mit-Tuneżija. Il-ministru tal-Agrikoltura Taljan wera n-nuqqas ta’ qbil tiegħu għad-dħul fis-suq ta’ ross mill-Vjetnam bla tariffi. L-Italja qed tgħid li s-settur agrikolu Ewropew ma għandux ikun issagrifikat minħabba l-ftehim ta’ kummerċ.

Franza u l-Polonja qed jisħqu biex ma jingħatawx ħafna konċessjonijiet lill-Amerikani waqt in-negozjati tat-TTIP. L-Irlanda inkwetata mis-settur taċ-ċanga minħabba ftehim ta’ kummerċ mal-pajjiżi tal-Amerika Latina.

L-Isvezja, ir-Renju Unit u d-Danimarka qed jistennew il-benefiċċji mill-ftehim ta’ kummerċ, l-aktar mal-Istati Uniti u l-Ġappun.

Fl-UE, l-iktar pajjiż li jipproduċi prodotti agrikoli huwa Franza (18% mit-total kollu ta’ dak prodott fl-UE), warajh il-Ġermanja (14%), l-Italja (13%), Spanja (10%), ir-Renju Unit (8%), l-Olanda (7%) u l-Polonja (5%). Flimkien dawn il-pajjiżi jirrappreżentaw tliet kwarti tal-produzzjoni agrikola tal-UE.