RYANAIR TĦARBAT TITJIRIET TA’ 400,000 PASSIĠĠIER

RYANAIR qalet li ma kinitx se tibbukkja titjiriet ġodda ma’ linji oħra tal-ajru għall-passiġġiera li ntlaqtu minn kanċellazzjonijiet ta’ 50 titjira kuljum sal-aħħar ta’ Ottubru f’pajjiżi Ewropej. “Ma nifilħux inħallsu t-titjiriet ma’ linji tal-ajru oħra għal dawk li ntlaqtu ħażin. Lanqas mhu se nagħtu kumpens għall-bookings ta’ lukandi jew karozzi tal-kiri’, qal Michael O’Leary, CEO ta’ Ryanair.

Fil-Parlament Ewropew Alfred Sant staqsa lill-Kummissjoni Ewropea biex tgħid x’azzjonijiet qed tipprepara kontra Rynair wara li din il-linja tal-ajru ħassret numru kbir ta’ titjiriet f’pajjiżi Ewropej. Ryanair ħabbret li se tkun qed tikkanċella bejn 40 u 50 titjira kuljum sal-aħħar ta’ Ottubru li se jħallu impatt fuq 400,000 passiġġier.

“Fuq il-bażi li Ryanair iggwadanjat pożizzjoni dominanti f’dawn l-aħħar snin fuq numru kbir ta’ rotot tal-ajru fl-Ewropa, kif ukoll minħabba l-mod kif ikkanċellat numru kbir ta’ titjiriet u kif dawn se jaffettwaw stati membri varji tal-Unjoni Ewropea, liema azzjoni se tkun qed tieħu l-Kummissjoni Ewropea lejn Ryanair?” staqsa Dr Sant.

Ryanair infurmat lil 400,000 passiġġier li t-titjiriet tagħhom ġew ikkanċellati minħabba taħwid fir-roster tal-piloti.