SAJJIEDA MALTIN IMĦASSBA BIL-KWOTI TAL-PIXXISPAD

Is-sajjieda tradizzjonali Maltin imħassba dwar kemm jistgħu jżommu fil-wiċċ fis-sajd tal-pixxispad. F’laqgħa mal-MEP Alfred Sant, is-sajjieda qalu li fit-tqassim tal-kwota Maltija, huma se jmorru ħażin waqt li l-kbar se jingħataw in-nifs.

L-Għaqda Internazzjonali tas-Sajd bdiet iddaħħal kwoti fuq is- sajd tal-pixxispad għall-pajjiżi differenti. Il-Kummissjoni Ewropea ħabbret li 70.7% tal-kwota totali tal-qbid tal-pixxispad se jmur għall-Unjoni Ewropea, 5.2% għall-Alġerija, 9.9% lil Marokk, 9.6% lit-Tuneżija u 4.2% lit-Turkija.

Il-pajjiżi tal-Unjoni għad iridu jiddiskutu l-qsim tal-kwota bejniethom. L-Italja hija l-aktar pajjiż li tistad din il-ħuta (45%), warajha l-Marokk (14%), Spanja (13%), il-Greċja (10%) u t-Tuneżija (7%).

Il-KE qalet li l-kwota tal-qbid tal-pixxispad se tonqos bi 2% fis-sena. L-Unjoni qalet li se tipprovdi fondi bħala għajnuna għas-sajjieda. Skont l-NGO Oceana, il-popolazzjoni tal-pixxispad naqset b’70% fi tletin sena.